Tinirau rau ko Hineteiwaiwa. Ka titiro, ka hoki atu. Ka ui mai nga wahine: “Keiwhea?” Kiia atu e Ruramahara: “Na ia, kei te kainga wai whakaata.”—“Kei te aha?”—“Kei te noho raua ko tona hoa.” Ka ki atu a Ruruwareware: “Ko Tinirau anake i kitea.” Ka ki atu a Rurumahara: “Erua nga tangata i kitea e an.” Ka ki atu a Ruruwareware: “He parau ia.” Ka ki atu a Rurumahara: “I kitea ano e au, e rua o nga upoko, e wha o nga waewae.” Ka mea nga wahine a Tinirau, ma raua ano e haere. I noho ano a Tinirau raua ko Hineteiwaiwa i te kainga o nga wai whaka-ata. Ka hemo raua i te kai, ka ki atu te tane: “Haere taua ki te kainga, ka mate taua i te kai.” Ka mea te wahine, kia noho; ka karakia: “Tukutuku iho ana, hekeheke iho ana"—kua pu nga kai ma raua. Ka kai raua i aua kai. Ka hemo raua i te hauaitu, ka ki atu te tane: “Haere taua ki te kainga, ka mate taua i te mataotao.” Ka mea atu te wahine: “Tukutuku iho ana, hekeheke iho ana.”—Kua pu nga weruweru kua mahana raua. Ka puta mai nga wahine a Tinirau, ka ki atu te waha o Tinirau ki a Hineteiwaiwa: “Kia ata tu i ou taokete.” Ka ki mai tera: “Ahakoa he riri, he hanga kino e haere mai na aua wahine—.” Na, kua tata mai. Tu tonu atu a Hine ki runga, ko te mata ko te rakau i a ia. Homai tou te rakau a tetahi wahine ki a Hine, ka ngaro atu, ka taho. Ka pakaina e Hine ki te rakau, ka mate ra tetahi. Tu tonu mai tetahi; ho mai te rakau. Ka ngaro atu a Hine, ka taha. Ho atu te mata, kua mate tera wahine, tokorua, mate anake. Ka haea nga puku ka karanga a Hine kia Tinirau: Titiro mai i au tamariki.” “Pu ana mai nga mahi i waho, me nga taipu kainga. Ka noho a Tinirau raua ko Hineteiwaiwa; ka hapu te wahine i a Tinirau. Ka puta mai he tamaiti. A, po maha noa atu noho raua. Ka whiti te rau, ka haere raua ki waho, ki te wahi taumarumaru noho ai. Ka ki atu te wahine: “Hakurekia toku upoko.” Ka hakurekia te upoko o Hine e Tinirau. Ka mutu, ka ki atu te waha a Tinirau: “Hakurekia toku hoki.” A, hakurekia ake e Hineteiwaiwa te upoko o Tinirau.—Ka puta mai te Porewakohu, me te ruru rahi te ahua; i roto a Rupe, he tungane no Hineteiwaiwa. Ka tata mai, ka kitea he tangata: ka tangi mai. "Ko Rupe—ko Rupe—te tungane; Ko Hine—ko Hine—te tuahine.” Ka tangi atu a Hineteiwaiwa. "Ko au tenei—ko Hine—te-iwaiwa. Ko Hinetangarumoana.” Whaia iho e Rupe, ka mauria atu te tuahine me te tamaiti hoki. Ka karanga atu a Tinirau; “E Rupe, whakahokia mai a taua tuahine.” Kahore hoki. Ka riro tonu i a Rupe.—I reira hoki i rongona, ko tetahi ingoa o Hineteiwaiwa, ko Hinetangarumoana.