Go to National Library of New Zealand Te Puna Mātauranga o Aotearoa
Volume 7, 1874
This text is also available in PDF
(4 MB) Opens in new window
– 41 –

1. Ko Kaitangata raua ko Whaitvri.

I noho a Whaitiri i runga i te rangi; he wahine. Ka tae mai te rongo a Kaitangata, i noho ra i raro nei. He Kaitangata!—Kahore, he rongo noa. Na, ka haere mai a Whaitiri, ka tae mai ki te kainga i a Kaitangata. Ka noho mai taua wahine i kona i a Kaitangata.—Na, ka haere a Kaitangata ki te moana, ki te hi ika; ka u mai ki uta. Kahore hoki he ika kia mau i ona maka: kahore he kaniwha hei whitiki i te kauae o te ika. Ka ki atu a Whaitiri i aua maka kia homai, kia kitea e ia. Ka ki atu a Whaitiri: “Ko au maka enei?” Ka ki mai a Kaitangata. “Ae.” Ka ki atu tera, a Wahitiri: “Kahore he kaniwha. Na, titiro mai.” Ka weraina atu tona tara. Ka mea atu tera, a Kaitangata. “E—.” Ka whakarihariha atu, ka haere ki waho.

Ka noho taua wahine, ka ta i te korohe. Ka auina ake ka haere a Kaitangata ki te moana. Ka noho te wahine, ka kitea atu e tera, e Whaitiri, te waka a Tupeketi, a Tupeketa, e manu ana mai. Ka haere atu taua wahine ki te wai, ka makere ki roto, ka ruku, ka ea. Ka karanga a Tupeketi: “He tangata ranei, he manu ranei?” Ka ruku. Katahi rawe te kitenga i raro i te waka. Ka tu a Tupeketi ki runga, kia werohia. Ka no ake te koripi, ka haea te puku a Tupeketi, ka taka iho ki roto ki te korohe. Ka oma tetahi ki te ta, ka mea kia werohia a Whaitiri; ka ho ake a Whaitiri i te koripi, ka taka ki raro, ki roto ki te korohe.—Ka kau a Whaitiri ki uta; ka waiho atu nga tangata i reira, i roto i te korohe. Ka ki atu ki te hunga wahine: “Kumea mai ki uta.” Ara mai,—he waewae tangata!

Ka ki atu a Whaitiri ki a Kaitangata (kua hoki mai ia i te moana) kia whakaponohia. Ka ki atu a Kaitangata: “Kahore kia matau i au.” Ka ki atu a Whaitiri: “Whakaponohia te tangata a ta taua tamaiti,” (kua hapu a Whaitiri). Ka ki atu a Kaitangata: “Kahore kia matau i au.” A, ka ki atu a Whaitiri: “Aua ra, mahau e whakapono te tangata a ta taua tamaiti; nahau rongo hoki.”—Na, ka mea a Whaitiri, mana e whakapono. Ka whakapono

– 42 –

a Whaitiri, ka taputere te karakia. Ka oti te karakia, ka kotikotia nga tangata; ka kainga e taua wahine. Ko nga iwi ka whakairia ki runga o te whare.—Ka maroke; ka kaiatia e Kaitangata, hei maka. Ka taia hunatia; ka oti te kaniwha, ka taka ake, ka kawe ki te moana. Ka kai te ika, ka hutia ki runga, he hapuka. Tae rawa mai te pakurutanga ki a Whaitiri. A, na te waka ano ka tomo, te hapuka, ka hoe mai ki uta. Ka unuhia nga hapuka, ka taona ki te umu. Ka maoka, ka kai a Whaitiri i te hapuka.

Muringa ra ka pangia nga kanohi a Whaitiri, ka parewha. Ka noho a Whaitiri. Ka ahiahi te ra, ka moe ai iho. Ka kiia mai e te wahine o raro o te reinga: “Aua ra, te mea ka mate na koe, ko nga iwi a tau patunga kua oti te kawe e tou tane ki te moana; no reira nga hapuka i kai na koe, ka mate na koe.”

Ka noho a Whaitiri. A, nui noa atu nga ra ka puta ki waho, ko Hema. A, noho ana a Hema.—A, no tetahi ra ka haere mai nga tangata kia kite i a Kaitangata. I waho o te whare noho ai. Ko Whaitiri ia i noho i roto o te whare. Ka ui atu nga tangata ki a Kaitangata: “E aha ana te wahine e noho i a koe?” Ka ki mai a Kaitangata: “Kei te wahine e noho i au: ko te kiri o tenei wahine, me te hau tonu; ko te ngakau o tenei wahine, me te huka tonu.”—Kua rongona e Whaitiri.

Ka riro nga tangata, ka haere mai ki ro o te whare noho ai te tane. Ka ki atu te wahine: “He aha a koutou korero?” Ka ki mai te tane: “He aha koia hoki, he korero noa ano ia.” Ka ki atu te wahine: “He aha a koutou korero?” Ka ki mai a Kaitangata: “Ko Whai-tane e ui ana mai ki a koe; koia matou e korero mai nei.” E huna ana a Kaitangata. Na, kua rongona atu e taua wahine, e Whaitiri. Ka mate i te whakama. Ka korero a Whaitiri ki a Hema: “Kauraka koe e whana ake; kia konokono ariki, kia tupu ou hua, mana e piki ake nga rangi i a Tamaiwaho.”—Na, ka kake a Whaitiri. Ka kapo a Kaitangata ki te weruweru o Whaitiri. Ka kake ake a Whaitiri ki runga, ka tae ki te Putoetoe, ki rara noho ai.