(me te wiri ano o ratou), “E ! ka kapi te whenua i te nui o te ope !”

Katahi a Tauhia ka karanga atu, “Moku anake ano ena hoa-wha-whai; kahore mo koutou.” No reira, ka nui te hari o ana hoa, a, ka mutu te mataku.

Katahi ka peke atu a Tauhia ki te patu i te ope a Takurua. Tokorua ki te hinganga i tana patunga kotahi; no konei ka whati te ope, a, patua haeretia e ratou ko ana hoa, a, hore rawa atu he tangata i ora. Me te rangatira hoki, me Takurua, mate katoa.

Katahi a Koieie ka piki ki runga ki tetehi puke, ki Puke-kowhiwhi, ka karanga, “Kei te whetu au e ! kei te marama !” No reira i rongo mai ai taua iwi—a Ngati-whatua—i matau ai hoki, kua hinga te pare-kura a Tauhia. Na, ka whakahua te hari a Tauhia ratou ko ona hoa i muri i te hinganga o ta ratou parekura:—

Aue ! uhi mai te waer !
A, ko roto ko taku puta !
A, he puta aha te puta ?
A, he puta tohu te puta,
A, e rua nei, ko te puta-e !

I muri i tenei, ka hoki mai a Tauhia ki tona pa, ki Otakanini, a, taea noatia tona matenga.